【《愛.回家》上位小生】 離開無綫移居蒙古開牧場 35歲何君誠:希望賺多啲錢可以照顧父母

《愛.回家》上位小生何君誠,離開無綫北上發展,不過,佢唔係返內地拍劇,而係喺蒙古開牧場、旅館,新年過後,佢就會搬去蒙古住。「離開嘅時候,某程度上都係因為金錢問題,令我決定離開呢間公司,因為我始終低產量,到我臨離開前兩年都算係低產量,公司同我研究,話我低產量,問我有冇諗到點樣發展?喺咁嘅情況下,我就選擇咗離開。

我比較特別,好多人離開TVB之後會繼續做演員,但係我離開TVB嗰一刻,掙扎位係決定唔做演員,下年我會喺蒙古開一個牧場,呢個係我離開之前到而家,計劃會做嘅一件事,因為自己喺TVB任性咗十年,人本身長大咗十年,爸媽都會長大十年,自己心裡面希望做多啲嘢賺多啲錢,可以好好照顧爸爸媽媽,所以我決定唔再浪費時間,做一件自己未知嘅事情。但係做生意,我只要睇通市場就一定賺到錢,可以照顧屋企人。」開牧場可以賺錢?仲要喺蒙古!「好賺錢。首先蒙古對香港人嚟講,係一個好原始嘅地方,但其實當你去過就會跌眼鏡,根本已經唔係我哋諗嗰個世界,但亦都仍然有我哋諗嗰個世界,真係有大草原,而我想做嘅就係喺大草原開個牧場,當中會有旅館,可能會養羊、養馬,羊就係供食用,馬就俾人策騎,係一個旅遊景點。」聽何君誠講,佢做晒資料搜集,近呢半年,每個月都會去一次蒙古實地考察,好認真。「最近呢次係我人生第一次去零下35度嘅地方,係一個好好體驗,亦都幾有趣,而家嘅蒙古,無人會發展一個喺零下35度天氣嘅生意,但其實呢個發展空間好大,所以我幾鍾意呢個地方。而我去到見到而家從事旅遊嘅人,佢哋都會話,蒙古每年只得三個月時間做生意,但呢三個月嘅生意你唔使憂心,因為早三個月旅館啲房已經會訂滿,所以如果肯用心投資去做,唔會係一件難事。」為咗呢盤生意,何君誠投資咗幾多呢?「我自己會投資積蓄,亦都搵到投資者,一齊去視察。其實而家內地好有趣,你只要肯做,其實唔需要投資好多,我亦都搵咗一個唔需要投資好多嘅地方。好簡單,一個牧場,一個大草原,一年租金只係幾萬蚊,你諗吓其實無乜機會輸。」

[adinserter block=”1″]

開牧場,養馬養羊養牛,對於何君誠嚟講幾乎無接觸過,完全係個初哥。「無錯,而家努力學緊,嚟緊會喺東莞附近一個馬場學習養馬知識,本身有讀管理課程,其實我主要做建設嗰一部分,會諗吓做生意要有咩設施,因為頭先講過市場好大,點解市場會咁大?因為我而家投資嘅地區,其實無南方人會去,全部都係北方人,放假時會揸車去玩一星期。對於南方人市場可能有99%發展空間,其實已經好足夠,所以亦都唔使點擔心。」當初揀蒙古呢個地方發展,原來一切都係因為「任性」而起。「有時自己都會好任性,我同朋友講,咩嘢都唔理,要養一匹馬,唔理喺邊度,總之我要養一匹馬,因為我鍾意馬,想喺人生裡面接觸馬,佢哋就提議蒙古,因為蒙古本身都有好多馬,你諗吓有冇辦法喺當地養一匹馬啦,我就飛咗去蒙古,首先梗係去玩啦,嘗試學騎馬。」何君誠話當地人好單純,你問咩佢哋就答咩,所以佢一邊學騎馬,一邊問當地人生意經。「當地人幾純樸,唔會介意將所有嘢講晒俾你聽,你咪去做囉,因為市場未飽和嘛,無土地問題嘅地方係唔會有問題嘅。佢話俾我哋聽,一個馬場每日盈利六千元,當中只係有十匹馬俾人策騎。我哋覺得好可觀,呢樣嘢都唔係吸引我去做嘅原因,吸引我嘅地方係,我剛才講過,要租一個草原,一年只需四、五萬,買一匹馬只需一萬元,我心諗唔需要搵地方養,自己租一個場,買一匹馬,等佢自己喺度食草、生活,一年都只係花幾萬元,就開始慢慢諗。不如開一個牧場,又可以養啲動物,又可以賣,又可以俾人騎馬,再諗吓反正都做個牧場出嚟,不如做埋旅館,一步一步就會諗到成個構思,點解會去蒙古發展。」

[adinserter block=”1″]

大家唔好以為何君誠用咗好耐時間去計劃,佢只不過係用咗一個禮拜嘅時間去構思!「其實係喺我一星期嘅蒙古之旅諗嘅,我一直支持自己,因為目的只係想自己有馬騎,最初其實唔係想做生意,但係豁出去,租個草場都係四、五萬,唔養羊、養馬,唔做生意,淨係割草賣番出去,都一定賺番嗰四、五萬蚊,總之條數唔蝕本你就俾我玩啦,我就係用呢個方法去諗,開始會睇晒整個城市,因為我都係繞一圈去行,會睇到好多人嘅經驗、經營方法,計到數根本唔會輸,再加上喺南方搵間旅行社做推廣,整件事已經無問題,所以睇完幾次,每個月都去一次,到而家已經選址咗兩個地方,會喺當中二揀一,買落嚟再租埋旁邊兩個草場就可以開始營業。」既然決定做,點解何君誠要租草原,而唔係買草原嚟長做呢?「草場係無得買嘅,草場一定係租嘅,因為當地法例係政府將草原分割俾蒙古原族民,即係蒙古人,佢哋就負責管理,好有趣,例如你係蒙古人,生咗一個小朋友,你個仔就可以分到三百畝地,可能有錯㗎,我都係聽番嚟嘅。政府只需要你做一件事,就係保持草原原貌,政府就會補貼俾你,唔可以令草原沙漠化。而有當地人都唔會做生意,唔會畜牧,就會租出嚟,我哋就會租啲草場去做自己嘅牧場。」因此何君誠就租草原做牧場,再買地起旅館!「而我話買地係因為想有啲建設,我係有心長遠發展,無心嘅話就咁租個草場玩幾年,厭倦咗就離開,但係我想長遠發展時,想有延續,至少開間酒店,都要有個辦公室,或者房間係用磚建築嘅,暫時睇中一間工廠,原先係一間工廠,要問吓可唔可以改建成旅館;另一間原先係學校,但係學校已經改建咗,變成一個種植場,我要問吓可唔可以由種植場變成一間旅館,呢啲所有條例如果全部通過,就會開始發展,出年五月開始就會住喺蒙古,至少住三四個月。我口話要進駐三、四個月,但心目中覺得至少頭三年,都要將全副心機放喺牧場上!」

有晒全盤計劃,何君誠隨時起行,不過始終人生路不熟,佢唔擔心俾人搵笨呢?「其實人生到而家,一直都俾人搵緊笨,某程度上我哋成日講,打工已經係俾人搵緊笨,你老闆叫你努力工作幫佢賺錢,而無人可以保證,打工可以變打工皇帝,可以創業輸掉一切,但付出等於自己全部嘅時候,我覺得比付出等於人哋嘅所有更值得,所以你問擔唔擔心受騙,呢方面無得估,唯有盡可能喺未做好之前了解多啲。」

Source: nextplus.nextmedia.com

You May Also Like

Leave a Reply

Your email address will not be published. Required fields are marked *